香港
台灣
北美

七級偽術:其實我都好攰 - 彭瑪莉

財經要聞 

林鄭的公關可以說有人滿之患。 資料圖片

休息、工作、再工作……
但實情是休息永遠不夠,工作永恆過多。日復日,曾經,下班之時收音機播的是《恬淡情懷》,後來漸漸變了《音樂情人》,最近竟然成了《講東講西》。一邊聽,一邊覺得荒謬,唔,那是說該日工作已近十六小時,我想我也有資格說攰。
然而再攰,你總得敬業樂業做下去,再攰,你也只宜向伴侶撒嬌,向老死訴苦,總不成以此為理由,推掉公務約會吧?
和人吹水,講到林鄭公關係咪專登整蠱佢,冇理由唔知以攰再度推辭唔入天水圍會出事箒,唔通好似花生友話齋,班公關仲嬲緊阿聰單嘢,故意畀啲顏色佢睇?
唔係啩,Mary傾向相信行家好專業,不會立心同client攬炒。問題是林鄭那個粒粒皆星的選舉辦架構係點,邊個先係發言人,恐怕行家也搞不清。
Mary眼見淨係傍住林鄭出席各式場合的助手,由公關大姐、前高官數落去,起碼有五、六個叫得出名的公關大員,走馬燈一樣,叫人眼花撩亂,其實佢哋點分工、點決策先?這裏還未計在多個其他活動出現過,由各大企業、地產商派來客串的公關及高層,簡直可以話人滿之患。
但人多不一定好辦事,像天水圍這一役,最根本的問題不是用乜藉口去推,而是點解認為可以推?不是第一次食言,是推完又推,任何人都feel到你對人家根本毫不重視,feel到你不曾當過人家是priority,競選期間,你居然選擇咁赤裸暴露自己的底牌,而你身邊竟冇一人對你加以勸諫,我想這種離地和欠缺願意向她無底線死諫的班底,就是林鄭的悲哀。
噢,還是這樣,有人勸過,她一意孤行?唔,成日咁多災難,你唔攰我都攰。

彭瑪莉
mailto:marypang2015@gmail.com