香港
台灣
北美

趣趣地:
荷蘭球壇虎子輩出

蘋果波經 

喺球圈,虎父犬子嘅情況好多,不過荷蘭幾位球星嘅下一代,都似乎係「踢得之人」,除咗尹佩斯不時喺社交網站晒10歲囝囝沙基爾嘅球技外,古積特五歲大嘅囝囝艾登亦喺一場比賽一個扭幾個射入金球。你哋可以話佢哋小時了了,但古華特(小圖右)嘅17歲囝囝祖斯甸就貨真價實喺周日嘅荷甲入波嘞!

司職中場嘅祖斯甸古華特喺周日對精英隊場荷甲,射入職業生涯第一球,幫球隊以1:1逼和精英隊。今場係祖斯甸為阿積士上陣嘅第11場比賽,阿積士喺26分鐘因為堅尼迪迪擺烏龍而落後,不過祖斯甸古華特喺32分鐘嘅入波就幫球隊追平。值得一提嘅係,祖斯甸射入佢第一球呢一日,同佢爸爸古華特射入喺荷甲最後一球嘅時間係相差10年零一日,而古華特當時係效力燕豪芬,射入嘅對手就係母會阿積士。