香港
台灣
北美

魚樂無窮:炒完美圖炒乜好 - 唐牛

投資 

金蝶主打企業管理軟件及雲服務業務。 資料圖片

北水炒股一向瘋狂兼來去如風,美圖(1357)昨早段再升近三成,市值逼近千億,但午後卻一瀉如注,埋單倒跌一成,大成交高開低收,加上連日炒到七彩,點計都要唞唞吧。
係咪嚟緊都唔使買科網股?如果有堅實業績支持,實在唔怕買,今日推介嘅金蝶(268),正正係板塊中堅份子。集團主打企業管理軟件(ERP)及雲服務業務,最新全年盈利大增1.7倍至2.9億銀人仔,毛利率進一步上升,強攻的金蝶雲預計明年可收支平衡,料成為未來增長最大引擎。

無他,全國兩會講明加快大數據、雲計算及物聯網應用,金蝶完全食正條水,騰訊(700)、華為、萬科(2202)都係佢嘅客仔,實力可見一斑。
金蝶貴為港股通成員之一,最新北水持貨量1.2%,總值1億多,隨手執隻科網股IGG(799)睇,北水持貨總值接近5億銀。金蝶今年累升約兩成,IGG搶高五成,資金換馬金蝶變得理所當然。
講多樣嘢你知,公司放榜後連環出手回購,低位有埋真金白銀盤支持,隨時成為北水下一輪瘋搶對象,𠵱家唔買等幾時?

唐牛
http://www.fb.com/tongcow88
本欄逢周二、四刊出