香港
台灣
北美

財路:江南食國策有排玩 - 錢雋

投資 

江南主打電力、電氣裝備用、特種電纜同祼電線。 資料圖片

江南集團(1366)食住內地城鄉改造、城鎮化同環保電力國策,主打電纜瓣數長玩長有,預測PE得4字頭單位數,平到笑。
江南主打電力、電氣裝備用品、特種電纜同祼電線,啱啱派上年度成績單,盈利稍為倒退24%到5.3億元人仔,主要係因呆賬撥備增加同更換高效益機械以致出售廠房設備產生虧損增加。
江南現價1.03元,貼近上市以嚟海底價,最新PE得6.6倍,要反映負面因素都九九十十,價爆殘PE平到笑。江南策略之一,係同國家電網公司、南方電網以及中國五大發電集團等優質國企,通過同大孖沙合作減低信用風險,所以估計江南呆賬係短暫問題。
再講,嚟緊五年,中國政府將會加大城鄉電網設力度,確定延慶智慧配電網105個專案,估計總投資額500億到1,000億人仔。又「13.5」西氣東輸工程,新增規模起個孖到2.7億千瓦;又內地規劃全國城市軌道交通建設總里程,到2020年時,會翻一番到7,000公里,連埋環保國策下新增風電裝機,江南主打瓣數大把財路,肥仔水。

場內專業評估,江南今、明兩年turnaround,EPS 0.197港元同0.22港元,預測PE得5.4倍同4.8倍。場內行家德威新材(深300325)兩年預測PE46倍同35倍、通鼎互聯(深002491)20倍同16.8倍,江南平咗大大截!
江南今年2月公佈解決股權高度集中問題,喺呢期股權分佈度睇,揸住江南5萬股上「機構股東」達142名,佔股權近21%,唔嘢少。趁價殘,兜江南,當翻半番到1.5元樓上計數,江南明年預測PE 7.2倍,比起最近磅嘅通鼎互聯,仲係平咗57%!

錢雋
細價股專家
本欄逢周二刊出