› 選擇地區
三藩市
紐約
洛杉磯
其他美國地區

2.0更叻走數 - 陳也

名采論壇 

薯片落區,市民跨區撲去撐場,合照並大呼「薯片加油!我唔想移民!」過去20年,有無高級公僕試過這種奇遇?真係見過,就只得鬍鬚曾一個!這是公關發功?不,你睇出錢塞俾警隊那位乜太夠有公關幫手,結果點?潑婦獻醜,辣臭男子漢!如果警隊落疊,以後仲使當差!幸好黑金被攔下來,而林鄭約見紀律部隊,唯有警隊以政治中立婉拒。關鍵時刻,警隊並無被西環代言人牽住鼻子走,保住理性,沒有把警隊低殘的聲譽再往谷底推,好險!
握票的八百個建制選委,幾多個會暗票投薯,值得期待。建制生意人,盲撐林鄭,等她還人情債,這種投資,蠢過羊牯!2.0更識走數,反口成癖,唐營上次滑鐵盧輸凸,五年後以為泊到好碼頭,大力過票,到林鄭當選,以其經常「錯不在我」下屬跳船大控訴的個性,反臉不認賬絕不為奇。到時這些大小老闆還要等N個五年才翻盤,這五年林鄭大開方便之門,中資長驅直入癲標掃晒靚地,你們有命等下去嗎?望着啟德大片染紅的港地,還幻想約2.0坐你隻遊艇出海食雞粥?嘿嘿嘿嘿!